Acts 8

1A ɓo da Bulus ntu Istifanus fi ɓo. Esayi a ga Yesu-viyi wahala, har kwa ɓa ze dole ɓa busi ɓa lo Yahudiya ɓedo n Samaria yi. 2A Yahudiyi, a Shekwoyi aza, ɓa ɓe ɓa Istifanus bi. 3Amma Bulus wa lo labaho-bahoi woi ga a viyi wahala, woi lo a puwa woi kun ɓa ɓe cei, Anugbayi du na nyikwoyi, woi lo ɓai n kurkuku.

Filibus Wa Lo Samariya

4A viyi n ɓa ɓo busi nyi ɓa lo aba gbo-gbo ɓai zhin waʼazi Yesu nya. 5Filibus wa lo Samaria wa da nabari Kristi nya nbwai. 6Aza ɓo kna tnubua ge wo ɓei zhin aɓo wowoyi n ɓa ba. 7Woi kun azafun nukwoyi ya, anyasan yi ɓai bwa lafiya. 8Aza ɓo dagma n mwa n ezhi yi.

9– 10– 11 ▼

▼The text of verses 9-Act 8:11 has been merged.

Ozaho ɓei nyi ɓo a yi wo ge Siman. Wo zhin ɓeyi nu, wo ɓei mi woi zhin aɓo gbo-gbo har ai da wo ɓo ngye wo zhin Kristi nu. 12Amma shi Filibus ɓei zhin ɓa Yesu waʼazi ge wonu zhin Masihu, njesun wa gna ɓa Shekwoyi bemi ɓo, aza ɓa ɓei ga gaiciya nyi, a ku ɓa zhin baptizma. 13Siman ce, wa gaiciya ga har a ku wo zhin batizma. Wa vi Filibus cei wo wo, ntu aɓo wowoyi ɓo nwo zhin nyi.

14Shi abara n Urushelima ɓei wo ge a Samariya yi ku gaiciya ga, ɓa tnu n Bitrus ɓedo n Yohanna yi ɓa lo Samariya. 15Ɓa lo ɓa si ɓa zhin aduwa ga ɓa, ntu ge ɓa gwo Zafun Gyi-gyi-yi. 16Ɓa to ɓei gwo Zafun kpam, aɓo bwa ɓa baptizma nu zhin dna n Yesu Kristi eye mi. 17Bitrus n Yohanna yi ɓa kpe ɓa abwa n tukwo ɓa gwo Zafun Gyi-gyiyi.

18Shi Siman ɓo gye lo nu, wa ga agyiwye ntu ge wa si iko hi.

19Wagna ge “Mi ye iko ye lo ntu ge aza gwo Zafun Gyi-gyi-yi, esa ma tu ɓa bwa cei n tukwo.”

20Bitrus wa gna wo ge, “Oho n ho agyiwyei fye ku zhangma. Ho gye ge ho ɓa mi ha si Shekwoyi kyauta ko? 21Ho ta gni deye bwa n zayi m, gama oho bugba to wu lo n Shekwoyi bwa m. 22Fa ɓenukwoyi ye ya zhin aduwa ntu ge Shekwoyi wa zhin ho gafara. 23Gama mi gye shewo lo ɓedo n laifi n ho bugba.”

24Siman wa gna ge, “Zhin aduwa ntuge aɓo nukwoyi ye ta bwa min.”

25Shi ɓa ɓo ku waʼazi zhin n Samaria ɓa je ze lo Urushelima. Ɓai zhin waʼazi nabari manayi nya n zokwo.

26Amma malaika gna Filibus ge, “Lo Urushelima zokwo n Gaza zhabui bwa.” 27Wa lo wa gye Habashayi za woi ɓe. Wo ɓei zhin tnu-tnuyi n Sarauniya Kandas nya nu. Woi zhi sujada zhin n Urushelima. Wo ɓei zhin oza kakayi nu. 28Woi zhi dna karusa woi ba nya dna Littafi Ishaya nya.

29Zafun Gyi-gyi-yi wa da ɓo n Filibus yi ge, “Lo vivi n karusa yi.” 30Filibus wa lo wa wo nya n wo ba. Wa nya wo ge, “Ho kpe nya ye lo n ho ba?”

31Ozahi wa gna ge, “Mɓa kpe ye n wuna, to oza yi lo n wo ɓa ga mi awyegan ma?” Wa ci Filibus ge wo gun tu karusa wa sase n gnisun woi.

32Nya nyi n wo ɓei ba: “A lo n woi ngye ekni n ana wu ba, ngye kugya sanu a gbe kwo eyi ya. To wa daɓon. Wa wo pipi.

33“Ntu wohin tukwo gba ɓo, to a gye wo ɓe manayi m. Ntu ge aza n wo ʼsa, ɓa ɓei zhin aza nukwoyi nu. Har ɓa wo wu.”

34Oza kakayi wa nya Filibus ge, “Ishaya ɓo da wohin nu ɓo ko ozado?”

35Sai Filibus wa ya wo awyega wu nya na da ntu Yesu tukwo.

36Shi ɓa ɓei lo ɓa gye nuwan, zahiwa cige, “Ma gye nuwan dna nyi, kni ɓa zhin to ha zhin mi batizma ma?”

37Filibus ci wo ge, “A ɓa mi a zhin ho baptizma n dai ho la gaiciya ga n ho bugba yi vinya.” Wa gna “Mi la gaiciya ga ge Yesu Kristi nu zhin Shekwoyi nugun.”

38Wa kpe karusa gni, ɓa ka fi n nuwan a zhin wo batisma. 39Shi ɓa ɓei kun n nuwan Zafun Gyi-gyi-gyi-yi wa la Filibus to za kakayi wa je wo gye m amma walo wo nya woi dagma. 40Sa fyewyi Filibus a gye wo gni n Azatus, wa da nabari manayi n bwai, dna ezhi doho-dohoi woi duya har wa lo Kaisariya.